A sección segunda da Audiencia Provincial de Ourense condenou a dez anos de cárcere como autora dun delito de intento de asasinato coa agravante de parentesco á muller que deu a luz na súa vivenda de Ourense en setembro de 2017 e botou o bebé a un contedor envolto nuns panos e dentro dunha bolsa do lixo. Un home que revolvía no cubo foi quen descubriu o pequeno.

O tribunal sinala que a condenada, que admitiu os feitos no xuízo, ocultou “a todo o mundo” o seu embarazo. “Ningunha dúbida cabe de que neste caso nos achamos ante unha actuación aleivosa, tendo en conta que a vítima era un recentemente nado, absolutamente indefenso, sen posibilidade ningunha de sobrevivir no lugar no que foi tirado pola procesada”.

Os maxistrados tamén lle impuxeron a privación da patria potestade e a prohibición de aproximarse ao seu fillo e de comunicarse con el durante vinte anos.