O Xulgado do Contencioso-Administrativo número 1 de Pontevedra conclúe nunha sentenza que a Xunta de Galicia se apropiou por "vía de feito" dun terreo de 15.000 metros cadrados situado no lugar de O Reibón, Meira, no termo municipal de Moaña (Pontevedra), ao executar as obras de desdobramento do corredor do Morrazo para a súa conversión na Autovía do Morrazo, inaugurada en xuño de 2019. A Administración autonómica incorreu, ademais de nunha “omisión total e absoluta do procedemento establecido”, en “desviación de poder”, segundo indica o maxistrado na resolución. O xulgado condena a Xunta a devolverlle o terreo ao propietario, eliminando os recheos e entullos depositados nel. O perito xudicial valorou o custo desa reposición en case dous millóns de euros. Ademais, a Administración deberá indemnizar o demandante con 47.391 polas árbores talladas.

“No marco dunha expropiación urxente, a apropiación pola Administración dunha superficie de solo non recollida na acta previa á ocupación e pola que non se aboou o preceptivo depósito previo, nin se expediu sequera acta de ocupación, constitúe, sen dúbida, unha vía de feito, unha actuación material sen título xurídico”, sinala a sentenza. Ademais, o xuíz recalca que nas expropiacións urxentes “os trámites de acta previa, depósito previo e acta de ocupación son esenciais”, pois sen eles “non se pode ocupar o terreo que se pretende expropiar”.

“Para a adquisición e ocupación material de solo pola Administración mediante título de expropiación forzosa debe tramitarse previamente un procedemento administrativo”, destaca o xuíz, á vez que subliña que nese documento “deben cumprirse os orzamentos formais para a declaración de utilidade pública e necesidade de ocupación dos bens afectados”.

Neste caso en concreto, segundo consta na sentenza, “non se expuxo ao público a nova relación de bens afectados, nin o interesado foi notificado cun trámite de audiencia”. O xulgado destaca que tanto o perito do actor como o designado xudicialmente concluíron “de maneira unánime” nas súas probas periciais que a apropiación por parte da Xunta dos 15.000 metros cadrados de superficie de terreo “non tivo a súa causa real nunha hipotética modificación do trazado do vial, senón na conveniencia de liberar a empresa construtora da custosa carga de transportar ata un lugar autorizado as terras e entullos sobrantes da obra”.

O predio do demandante converteuse, desta forma, nunha entulleira de materiais “á marxe do proxecto da autovía formalmente aprobado, no que non se prevía tal actuación, e sen unha xustificación suficiente”, conclúe o maxistrado.