O Xulgado do Contencioso-Administrativo número 2 da Coruña ditou unha sentenza na que recoñece o dereito dun funcionario interino a cobrar unha indemnización de 20 días por ano traballado tras o fin da súa relación laboral.
Ata a data os xuíces pronunciáranse a favor do persoal laboral das administracións públicas, sen que se recoñeceu este dereito ao funcionariado interino, quen por razóns de necesidade ou urxencia son nomeados para cubrir prazas vacantes, realizar substitucións ou afrontar exceso de tarefas ou programas, como ocorre en ámbitos como o Ensino, a Xustiza ou a Sanidade.

O fallo parte dun recurso contencioso-administrativo presentado por un docente, funcionario interino, que se encargou de facer unha substitución entre o 13 de outubro de 2015 e 14 de setembro de 2016. Ao termo da súa relación laboral, este profesor reclamou á Consellería de Cultura, Educación e Ordenación Universitaria de Galicia unha indemnización de 20 días por ano traballado.

Na sentenza, contra a que cabe recurso ante o Tribunal Supremo, o xuíz ampárase no acordo marco entre a CES, Unice e o CEEP sobre traballo de duración determinada e na doutrina comunitaria, especialmente na sentenza do 14 de setembro de 2016 no que se recoñeceu o dereito dunha contratada laboral do Ministerio de Defensa, Ana de Diego Porras, a cobrar indemnización tras finalizar a súa relación laboral. Establécese que o empregado público laboral e funcionarial de natureza temporal "non pode ser discriminado nas súas condicións de traballo, incluídas as súas retribucións, respecto dos empregados públicos nos que a temporalidade non sexa unha nota presente no devandito vínculo", salvo que existan fundamentos razoables para facer algunha diferenciación.

A xuízo do maxistrado, no caso deste profesor aparece unha "manifesta discriminación" entre o empregado temporal laboral na Administración Pública, ao que a se recoñece o dereito a indemnización por cesamento ou finalización da relación laboral, e o funcionario interino ao que se lle nega idéntica indemnización en razón exclusivamente da súa condición de funcionario interino.

O xulgado entende ademais que non existen razóns obxectivas que xustifiquen a negativa para concederlle unha indemnización ao demandante. Por todo o anterior e en base á doutrina comunitaria, o xuíz dá a razón ao docente, revoga a resolución da Consellería que lle denegaba a indemnización por ser contraria a dereito, e declara o dereito do demandante a cobrar unha indemnización de 20 días por ano, similar á que corresponde a un despedimento por razóns obxectivas, técnicas, económicas, organizativas ou de produción.