O Xulgado do Penal número 1 de Santiago absolveu un antigo xefe de planta dun centro comercial da cidade dos delitos de acoso sexual, abusos sexuais e acoso laboral dos que estaba acusado. O xuíz considera probado na sentenza que, entre 2012 e 2016, no lugar e horario de traballo, o sospeitoso “con certa frecuencia”, dirixiu á denunciante “comentarios relativos ao seu físico ou forma de vestir” e que lle mostrou “algúns vídeos ou fotos xocosos de contido sexual”. Excepcionalmente, segundo a resolución, tocoulle a cintura ou as pernas por encima da roupa “de forma fugaz e cauta, sen aproximarse a zonas eróxenas” e realizoulle insinuacións e proposicións de carácter sexual. Estas condutas, con todo, enmárcanse dentro do ámbito de protección propio do ordenamento laboral, non dentro da tipificación do acoso sexual e laboral do Código Penal, segundo consta na sentenza.

O xuíz salienta que “a pura solicitude de favores de natureza sexual no ámbito laboral non é delituosa”, pois esa petición debe ter unha consecuencia que provoque á vítima “unha situación obxectiva e gravemente intimidatoria, hostil ou humillante”. Ese factor, segundo explica o xuíz, permite “deslindar o auténtico acoso sexual do ataque contra a liberdade sexual, que por realizado nun determinado contexto (laboral ou docente) non se eleva, automaticamente, á categoría de acoso”. Neste caso, segundo o xuíz “non existe proba concluínte de presión laboral excesiva sobre a denunciante nin de trato discriminatorio”.

“Non basta que a solicitude sitúe á vítima nun contexto sexual non desexado ou non querido, senón que debe xerar un contexto que obxectivamente sexa gravemente irrespectuoso coa súa dignidade, honra ou intimidade ou un contexto gravemente hostil”, recalca o maxistrado, quen conclúe que a denunciante non era obxecto dunha conduta do acusado fronte aos demais compañeiros “tan brutal, cruel, humillante ou hostil susceptible de ser cualificada dunha intensidade lesiva para a dignidade humana suficiente para a súa encadre no acoso moral penal”.