O Xulgado do Mercantil número 1 de Pontevedra rexeitou a declinatoria de xurisdición presentada por Audasa, quen defende que corresponde á orde contenciosa-administrativa, non á civil, o caso aberto por mor da demanda colectiva presentada pola Fiscalía polas presuntas prácticas abusivas na cobranza da peaxe de Rande durante as obras de ampliación da ponte. O xuíz confirma, polo tanto, que o coñecemento do litixio exposto corresponde á xurisdición civil e que é competencia obxectiva do Xulgado do Mercantil 1 de Pontevedra. “Podemos facer ver a Audasa o pouco acertado da súa postura simplemente poñendo de manifesto o feito de que non foi capaz de mencionar nunha extensa declinatoria de 40 páxinas nin unha soa sentenza ou auto dun só xulgado ou tribunal que puxese en dúbida a competencia da orde civil para coñecer deste tipo de demandas”, destaca o xuíz.

Ademais, indica que a Fiscalía “non discute a regularidade das tarifas ou peaxes, senón a oportunidade de cobrarllos aos condutores cando, supostamente, Audasa non está a cumprir as obrigas legais que lle competen en canto concesionaria da xestión dunha autoestrada”. O Xulgado recalca que a actividade como concesionaria dunha autoestrada en relación cos condutores que pagan as súas peaxes queda “moi afastada do que se pode considerar como exercicio de potestades administrativas”.

“A propia norma á que apela Audasa recoñece que a súa actividade de explotación da autoestrada é de carácter comercial. Iso implica, necesariamente, que as relacións que establece cos usuarios desa autoestrada son de carácter estritamente privado, polo que as incidencias habidas nesa relación cínguense á esfera civil e, por tanto, han de ser discutidas ante os órganos da xurisdición civil, non ante os da xurisdición contencioso-administrativa”, argumenta o maxistrado. A resolución non é firme, pois contra ela cabe interpoñer recurso de reposición no prazo de cinco días.