O Xulgado de Instrución número 3 da Coruña rexeitou o recurso de reforma presentado por LaLiga contra o auto do pasado mes de agosto no que decretou o sobresemento provisional e arquivo do procedemento aberto contra o capitán do Deportivo pola presunta comisión dun delito de corrupción entre particulares. O futbolista foi denunciado por LaLiga tras facerse público un audio que enviou a un grupo privado de WhatsApp no que, segundo se fixo constar na denuncia, “manifestaba a posible predeterminación” do partido que o Deportivo ía disputar contra o Fuenlabrada.

“Como ben se fundamentou no auto, a mensaxe obxecto de denuncia non se entende que revista caracteres de delito ningún e, tal e como fai constar o Ministerio Público, entender que puidese existir un amaño do partido entre xogadores resulta máis ben o argumento dunha película ou novela de ficción, de aí a resolución que agora se recorre”, indica a maxistrada no auto, no que lembra que o xuíz instrutor “non está obrigado a practicar dilixencias de investigación se non entende que os feitos denunciados revisten caracteres de delito, facendo declarar como investigado a unha persoa de maneira gratuíta, sen indicio ningún de comisión de delito”. LaLiga, ademais do recurso de reforma que foi rexeitado polo xulgado, presentou un recurso de apelación contra o auto, o cal será resolto pola Audiencia Provincial da Coruña.

A maxistrada asegura na resolución que é “importante” facer referencia ao auto ditado pola Audiencia Provincial da Coruña o pasado 1 de marzo, no cal advirte que a actuación do Centro Nacional Policial pola Integridade no Deporte e as Apostas (CENPIDA) neste caso “resulta preocupante, non explicándose a actuación de tales funcionarios”. A instrutora sinala que LaLiga, no seu recurso de reforma, fai referencia “a outros posibles ilícitos e outros responsables que non foron obxecto do presente procedemento nin da súa denuncia”. No recurso, segundo destaca a xuíza, alega que non quería dicir que “forzosamente” se debese recibir declaración como investigado ao capitán do Deportivo, “ senón que esta ben puidese ser como testemuña”.

“As dilixencias a que se refire a parte como as posibles para practicar no presente procedemento versarían sobre feitos que non son obxecto de denuncia e polos que se adoptou a decisión que agora se recorre”, recalca a maxistrada no auto no que rexeita o recurso de LaLiga.