O programa Educar en Xustiza, que no curso pasado bateu récord cunha asistencia de case 4.000 estudantes de 96 centros educativos de Galicia, xa rexistrou no seu primeiro trimestre a participación de máis de 1.900 alumnos/as. Esta iniciativa, promovida polo Consello Xeral do Poder Xudicial (CXPX) e o Tribunal Superior de Xustiza de Galicia (TSXG), busca que o alumnado coñeza o funcionamento dos órganos xudiciais da comunidade. Para isto, os estudantes asisten a xuízos nalgún dos 45 partidos xudiciais de Galicia e, ademais de coñecer as instalacións, poden charlar cos maxistrados e maxistradas sobre o seu traballo e o alcance das súas decisións. 

Durante as visitas, os xuíces e xuízas inciden en aspectos que poden afectar á mocidade, como a violencia de xénero, os delitos que teñen que ver co uso das redes sociais, o acoso escolar ou outros relacionados co consumo de drogas. Os membros da carreira xudicial tamén lles explican conceptos básicos da xurisdición de menores, como os dereitos que lles asisten e o sistema de imposición de penas, ao igual cos seus dereitos e deberes. 

Esta edición proseguirá co inicio do segundo trimestre escolar, a segunda semana de xaneiro. Aqueles centros educativos que teñan interese en participar aínda están a tempo de facelo. Para iso, deben poñerse en contacto co Gabinete de Prensa do TSXG a través do correo: comunicacion.tsxg@xunta.gal