A sección primeira da Audiencia Provincial da Coruña emitiu unha providencia na que acorda distribuír as cantidades depositadas no órgano xudicial entre os 265 afectados pola catástrofe do Prestige. En concreto, a Audiencia reparte 51.742.034 euros, dos que 27.199.464 foron depositados polo FIDAC. O resto, 24.542.570 euros, proceden na súa maioría (22.777.986¬) da aseguradora do buque, The London Steamship Owners Mutual Insurance Association (The London P&I CLUB) e, o resto, da venda do fuel recuperado do petroleiro.

Os fondos repártense proporcionalmente, segundo as indemnizacións recoñecidas, entre o Estado español -¬como principal prexudicado¬-, que recibirá 40.671.748 euros, o francés (9.265.515 euros), a Xunta de Galicia (202.472 euros) e outros 262 afectados pola vertedura que son particulares, empresas, mancomunidades, concellos e sociedades. A Audiencia estableceu o principal de execución de sentenza en 1.441.562.943 (sen contar os 392.923.977 de xuros moratorios; 87.144.811 de xuros procesuais; e 573.797.973 de xuros, custas e gastos de execución).