Máis de 2.000 estudantes de 60 centros educativos galegos participaron este ano no programa Educar en Xustiza. A iniciativa, promovida polo Consello Xeral do Poder Xudicial (CXPX) e o Tribunal Superior de Xustiza de Galicia (TSXG) para que o alumnado coñeza o funcionamento dos órganos xudiciais da comunidade, retomouse este ano, pois en 2020 se suspendeu como consecuencia da pandemia. O programa iniciouse no mes de marzo, aínda que antes desa data algúns centros participaron nel de forma telemática ou realizaron visitas puntuais a xulgados e tribunais mantendo as medidas preventivas fronte á COVID-19.

Doce partidos xudiciais das catro provincias acolleron aos participantes, os cales foron recibidos por xuíces e xuízas, quen lles explicaron en que consiste o seu traballo e responderon as dúbidas que lles expuxeron. Ademais, asistiron a vistas orais das diferentes xurisdicións, sobre todo penal e social, durante as que comprobaron de primeira man en que consisten os xuízos e o papel que desempeña cada un dos intervenientes neles. 

Durante as visitas, os xuíces e xuízas incidiron en aspectos que á mocidade lle poden afectar de forma directa, tales como a violencia de xénero, os delitos que teñen que ver co uso das redes sociais, o acoso escolar, o sexting ou outros relacionados co consumo de drogas. Ademais, explicáronlles conceptos básicos da xurisdición de menores, como os dereitos que lles asisten e o sistema de imposición de penas, así como os seus dereitos e deberes a partir da Lei Orgánica 1/1996, de protección xurídica do menor. 

En concreto, en Educar en Xustiza participaron 2.233 alumnos/as, dos cales 754 foron recibidos en órganos xudiciais da provincia da Coruña; 304, de Lugo; 147, de Ourense; e 1.028, de Pontevedra. Dentro do programa tamén se organizaron charlas sobre violencia de xénero o sobre a presenza da muller na carreira xudicial en diferentes institutos da provincia de Lugo e en Vilagarcía. Nestes encontros, os maxistrados/as participantes desmontaron algúns bulos relacionados coas denuncias por violencia machista. 

Na iniciativa, ademais de estudantes de institutos galegos de entre 14 e 17 anos, participou alumnado de centros de formación profesional e da Universidade da Coruña e de Vigo. O programa Educar en Xustiza, dirixido a maiores de 14 anos, retomarase o próximo curso e nel poden participar os centros educativos de Galicia que formalicen a súa solicitude a través do Gabinete de Comunicación do TSXG.