O Consello Xeral do Poder Xudicial (CXPX) aprobou reforzar, como mínimo ata o próximo 30 de xuño, o Xulgado de Violencia sobre a Muller da Coruña coa incorporación dunha maxistrada máis. A Comisión Permanente acordou o nomeamento en comisión de servizo, con relevación de funcións, é dicir, que se dedicará de forma exclusiva ao órgano da Coruña, da actual titular do Xulgado de Primeira Instancia e Instrución número 3 de Betanzos. Desta forma, o CXPX acolleu a petición de reforzar o xulgado especializado en violencia realizada o pasado mes de novembro pola Sala de Goberno do Tribunal Superior de Xustiza de Galicia (TSXG) para conseguir reducir os procedementos en trámite e aliviar a carga de traballo do órgano, o que permitirá dar unha resposta máis áxil ás vítimas de violencia machista. 

O CXPX tamén deu o visto e prace a reforzar o Xulgado do Penal número 6 da Coruña, encargado de axuizar os procedementos que instrúe o Xulgado de Violencia sobre a Muller que non son competencia da Audiencia Provincial. A medida, que tamén foi solicitada o pasado mes de decembro polo TSXG, consiste nunha comisión de servizos, neste caso sen relevación de funcións, a favor do titular do Xulgado de Primeira Instancia e Instrución número 3 de Carballo. 

O xuíz, que reforzará o órgano polo menos ata o 30 de xuño, celebrará 30 xuízos mensuais relativos a violencia sobre a muller. O TSXG demandou esta medida en previsión do incremento de casos que se remitirán para o seu axuizamento ao Penal desde o Xulgado de Violencia sobre a Muller, unha vez que se incorpore a nova maxistrada. Ao reforzar este órgano, polo tanto, preténdese evitar un posible embotellamento. 

Xulgado de Violencia sobre a Muller 

O informe elaborado polo Servizo de Inspección do CXPX reflicte que o pasado 30 de xuño a pendencia de asuntos civís en trámite era de 267 procedementos, superior á media dos xulgados de igual clase da comunidade autónoma (163) e á nacional (82). En canto aos asuntos penais, na mesma data, a pendencia era de 1.018 casos, tamén superior á media dos xulgados de igual clase da comunidade (598) e á nacional (208). 

Xulgado do Penal nº6 da Coruña 

A pendencia de asuntos, a 30 de setembro de 2022, ascendía a 269, cifra superior á media provincial (234,1 asuntos) e da comunidade autónoma (232,1 asuntos). En canto ás executorias, a pendencia era de 56, inferior á media da provincia (624,2) e de Galicia (679,7). O tempo de resposta, nesa data era de 7,08 meses, inferior á media provincial (7,9 meses) e superior á media autonómica (6,7 meses). En canto á entrada, situouse no 107 % nos tres primeiros trimestres de 2022. A pesar de que non se supera por moito o módulo de entrada establecido polo CXPX, a Sala de Goberno considerou necesario este reforzo en previsión do incremento de casos que chegarán ao xulgado procedentes do de Violencia sobre a Muller. 

Xulgado de Primeira Instancia nº6 de Ourense 

A Comisión Permanente do CXPX tamén aprobou esta semana renovar, durante polo menos seis meses, o reforzo do Xulgado de Primeira Instancia número 6 de Ourense, especializado en dereito de familia, determinación da capacidade e internamentos. A medida de apoio consiste na renovación da comisión de servizo, sen relevación de funcións, a favor do titular do Xulgado de Instrución número 2 de Ourense. 

O informe elaborado polo Servizo de Inspección reflicte a seguinte situación do órgano: a entrada de asuntos superou o indicador establecido polo CXPX, alcanzando un 137 %, en 2020; un 143 %, en 2021; e un 148 %, nos tres primeiros trimestres de 2022. Ademais, a dedicación do órgano xudicial tamén superou o indicador marcado polo CXPX, situándose nun 183 %, en 2020; nun 253 %, en 2021; e nun 234 %, nos tres primeiros trimestres de 2022.