A sección primeira da Audiencia Provincial da Coruña condenou a M.S.C.V., exalcaldesa de Melide, e a quen era o arquitecto municipal cando se produciron os feitos, en 2009, como autores dun delito de falsidade en documento oficial. No caso da exrexidora, tamén o fai por un delito de prevaricación administrativa.

A Audiencia da Coruña condénaos tras considerar probado que emitiron unha certificación falsa dun proxecto que non chegou a realizarse. Pola contra, absolve ao representante da empresa adxudicataria da obra en base á súa declaración e á dos outros dous acusados, que negaron que estivese presente no momento da rúbrica da citada certificación.

Os maxistrados, que tiveron en conta a existencia de dilacións indebidas, condénaos como autores dun delito de falsidade en documento oficial á pena dun ano e seis meses de prisión, con inhabilitación especial para o exercicio do dereito de sufraxio pasivo por ese tempo. Á exalcaldesa a condena tamén á pena de inhabilitación especial para emprego ou cargo público por un período de tres anos e medio polo delito de prevaricación administrativa. A Sala considera que M.S.C.V. era "plenamente consciente de que o que se afirmaba no documento era falso, que foi expresamente advertida da improcedencia da súa elaboración e das consecuencias que levaba aparelladas".