A Sección Especial da Sala do Contencioso Administrativo do Tribunal Superior de Xustiza de Galicia, constituída para resolver recursos de casación fundados en infracción de normas emanadas da comunidade autónoma, ditou a primeira sentenza que resolve un recurso ordinario de casación, neste caso promovido por un particular contra unha sentenza ditada pola Sección Segunda desta Sala.

Versa a cuestión casacional sobre a correcta interpretación dos apartados 1, 2 e 3 da Disposición Transitoria 4ª da Lei 9/2002, do 30 de decembro, de Ordenación Urbanística e Protección do Medio Rural de Galicia, para os efectos de determinar se se produciu, no caso axuizado, a caducidade da licenza urbanística outorgada ao recorrente por non dar comezo ás obras en prazo, tal e como entendeu no seu momento a Axencia de Protección da Legalidade Urbanística. Así o corrobora dita Sección Especial ao acordar non haber lugar a casar a sentenza recorrida.

A sentenza, da que foi relator o maxistrado Benigno López González, é a primeira resolución xudicial que, neste territorio e en materia administrativa autonómica, decide un recurso de casación ordinario, competencia que, ata a modificación da Lei da Xurisdición Contencioso Administrativa operada pola Lei Orgánica 7/2015, do 21 de xullo, vixente desde o 22 de xullo de 2016, viña reservada ao Tribunal Supremo.