O Xulgado de Primeira Instancia número 1 da Coruña acordou, a pedimento do Estado, a execución provisional da sentenza que declara que o pazo de Meirás é propiedade pública e ordena á familia Franco a súa devolución. A maxistrada fixou a entrega voluntaria do inmoble por parte da familia Franco o 10 de decembro ás 11 horas. Por motivos de seguridade, e co fin de preservar a súa integridade, a entrega será verificada pola comisión xudicial no propio pazo. Os demandados mostráronse conformes coa execución provisional da sentenza. A xuíza, con todo, advirte que se non realizan a entrega no día e hora sinalados, “procederase no mesmo acto ao inmediato desaloxo”.

O Xulgado de Primeira Instancia número 1 da Coruña estimou o pasado 2 de setembro a demanda interposta polo Estado e declarouno propietario do Pazo de Meirás, polo que condenou á familia Franco á devolución do inmoble sen ser indemnizada polos gastos nos que afirmaba ter incorrido para o mantemento da propiedade. No procedemento, a Xunta de Galicia, o Concello de Sada, o da Coruña e a Deputación Provincial defenderon tamén a postura da Avogacía do Estado, mentres que como demandados constaban seis familiares de Francisco Franco e unha sociedade limitada.

A maxistrada Marta Canales declarou na sentenza a nulidade da doazón efectuada en 1938 da “finca denominada Torres ou Pazo de Meirás ao  autoproclamado xefe do Estado, Francisco Franco Bahamonde, por carecer do requisito esencial de forma”. Ao entender que a propiedade do inmoble corresponde ao Estado, a xuíza declarou tamén nula a parte da escritura pola que os herdeiros de Franco fixéronse co predio, así como a doazón que se recolle nunha escritura de novembro de 1982.

A familia Franco xa recorreu a sentenza, cuxa execución provisional se levará a cabo en decembro, ante a Audiencia Provincial da Coruña.