O Xulgado de Instrución número 3 de Santiago acordou aprazar as declaracións sobre o caso Alvia previstas para o próximo 29 de maio ao 10 de xullo, unha vez cesado o estado de alarma. As dilixencias practicaranse nas dependencias do xulgado que instrúe os feitos.

As testificais que se practicarán en xullo son as de catro traballadores de Talgo no momento no que sucederon os feitos: P.A.J.T., o técnico que asegurou que a empresa borrou probas do accidente; J.C.G.A., administrador de sistemas informáticos; J.L.B., xefe de taller; e L.A.H., director de mantemento. O xuíz indica que toma esta decisión despois de que o Xulgado de Instrución número 3 de Majadahonda lle comunicase a imposibilidade de practicar alí as testificais acordadas. Ademais, indica que a representación dos tres responsables do informe da consultora Ineco sobre a avaliación de riscos do tramo ferroviario Ourense-Santiago tamén solicitou a suspensión das declaracións previstas para o 29 de maio.