A Sala do Social do Tribunal Superior de Xustiza de Galicia (TSXG) desestimou a demanda da CUT contra o acordo de medidas de PSA Peugeot Citroën aprobado en marzo, que inclúe un Expediente de Regulación de Emprego (ERE) extintivo e dous temporais, xa que sostén que "non se aprecian elementos que perturben a adecuación e xustificación do acordo".

O Tribunal entende que o convenio -asinado pola empresa e os sindicatos SIT, UXT, e CC.OO.- "se axusta a dereito", e destaca que o proceso se efectuou pola empresa "con boa fe, ánimo de negociación e con transparencia, ofrecendo os datos precisos e relevantes, así como a información necesaria ás partes en negociación".

Para a Sala, "concorren as causas, organizativas e produtivas" para xustificar o ERE, e en concreto apunta ao "feito de atravesar un período transitorio ata a industrialización de novos modelos e a madurez no mercado dos vehículos fabricados no centro" de PSA en Vigo.