A sección quinta da Audiencia Provincial de Pontevedra, con sede en Vigo, condena a un ano e medio de cárcere a unha muller por estafar 2.100 euros a un amigo retirando cartos en efectivo coa súa tarxeta bancaria. O tribunal considéraa autora dun delito continuado de estafa agravada, polo que tamén lle impón o pago dunha multa de 1.050 euros e dunha indemnización de 2.100 euros aos herdeiros do prexudicado, quen faleceu. 

A Sala considera probado que a condenada, aproveitando a relación de amizade que mantiña coa vítima, utilizou a tarxeta bancaria e o PIN para sacar efectivo sen a súa autorización en varias ocasións, entre abril e maio de 2024. A acusada, segundo a sentenza, coñecía a clave porque algunha vez o prexudicado, que tiña problemas de mobilidade, pediulle que pagase coa tarxeta ou retirase diñeiro.  

Así, sinala que se apoderou da tarxeta “sen coñecemento nin consentimento do afectado, ben cando estaba durmido ou despistándoo”. 

Os maxistrados aprecian a agravante de abuso de relacións persoais, pois destacan que existía unha relación previa que facilitou a comisión do delito. A sentenza non é firme, pois cabe recurso de apelación ante o TSXG.