A Sala do Social do Tribunal Superior de Xustiza de Galicia (TSXG) declarou, nunha sentenza pioneira en Galicia, o dereito dun xubilado a percibir na súa pensión o complemento para a redución da brecha de xénero, o que, no seu caso, supón 27 euros ao mes por cada un dos seus fillos. Desta forma, o alto tribunal galego aplicou o novo artigo 60 da Lei Xeral da Seguridade Social (LXSS), pois a Sala considera acreditado que o demandante, un mariñeiro embarcado en barcos de bandeira de conveniencia, que a súa carreira profesional se viu interrompida e afectada debido ao nacemento dos seus fillos. 

O alto tribunal galego explica que, segundo a LXSS, no suposto de fillos ou fillas nacidos/as ata o 31 de decembro de 1994, para recibir o complemento se debe “ter máis de cento vinte días sen cotización entre os nove meses anteriores ao nacemento e os tres anos posteriores á devandita data”. Neste caso, segundo a resolución, o demandante non ten ningún día cotizado entre os nove meses anteriores e os tres anos posteriores ás datas de nacemento dos seus fillos, o que supón que ten dereito ao complemento para a redución da brecha de xénero, pois non consta que a outra proxenitora o cobre. A sentenza non é firme, pois contra ela cabe presentar recurso de casación ante o Tribunal Supremo.