A Comisión Permanente do Consello Xeral do Poder Xudicial decidiu atribuír ao Xulgado de Primeira Instancia número 6 de Ferrol e ao Xulgado de Primeira Instancia número 15 de Vigo o coñecemento, con carácter exclusivo, dos asuntos propios dos Xulgados de Familia, en virtude do previsto no artigo 98 da Lei Orgánica do Poder Xudicial.

Ambos órganos xudiciais, de nova creación, entrarán en funcionamento o próximo día 31, segundo a orde ministerial 1277/2017, do 22 de decembro, pola que se dispuxo a data de posta en funcionamento de 77 xulgados correspondentes á programación do ano 2017.

Segundo o acordo aprobado pola Permanente, o Xulgado de Primeira Instancia número 6 de Ferrol asumirá os asuntos propios dos Xulgados de Familia dos Títulos IV (Do matrimonio) e VII (Das relacións paterno-filiais) do Libro I do Código Civil, así como os procedementos relativos á liquidación de calquera réxime económico matrimonial e as execucións derivadas destes procedementos.

O partido xudicial de Ferrol conta na actualidade con cinco Xulgados de Primeira Instancia, ningún deles especializado en materia de familia.

O Xulgado de Primeira Instancia número 15 de Vigo asumirá tamén os asuntos propios dos Xulgados de Familia dos Títulos IV e VII do Libro I do Código Civil, así como os procedementos relativos á liquidación de calquera réxime económico matrimonial e as execucións derivadas destes procedementos.

Ademais, este órgano xudicial coñecerá, así mesmo con carácter exclusivo, dos procedementos de incapacitación, tutelas, curatelas e garda dos menores ou incapacitados dos títulos IX (Da incapacitación) e X (Da tutela, da curatela e da garda dos menores ou incapacitados) do Libro I do Código Civil e das execucións derivadas destes procedementos, así como dos asuntos de xurisdición voluntaria referidos a protección de menores.

O partido xudicial de Vigo conta na actualidade con catorce Xulgados de Primeira Instancia, dos que dous –os números 5 e 12- están especializados en materia de familia. Estes dous órganos xudiciais ingresaron en total 2.861 asuntos en 2016, mentres que o número de asuntos recibidos ese ano polos outros doce xulgados foi de 12.787.

O acordo da Comisión Permanente sinala que os asuntos obxecto de especialización que xa estean turnados aos Xulgados de Primeira Instancia de Ferrol e de Vigo actualmente en funcionamento continuaranse por estes ata a súa conclusión por resolución definitiva. A especialización en materia de familia dos dous xulgados de nova creación conta cos informes favorables da Sala de Goberno do Tribunal Superior de Xustiza de Galicia e do Servizo de Inspección do Consello Xeral do Poder Xudicial.