A Sala de Goberno do Tribunal Superior de Xustiza de Galicia aprobou hoxe a actualización do ‘Protocolo de actuación e organización nos órganos xudiciais do ámbito do TSXG’, no cal recomenda “o uso responsable e continuado de máscara” para o acceso aos edificios xudiciais e aos espazos comúns “durante todo o tempo de permanencia en eles”, así como nos despachos e oficinas das sedes dos órganos xurisdicionais da comunidade. Ademais, o documento establece que quen exerza a policía de estrados ou dirixa calquera acto xudicial ou gobernativo poderá “redistribuír os asentos na sala de vistas para garantir a distancia de seguridade e aconsellar o uso responsable e continuado de máscara”. No caso de que non se poida garantir a distancia de polo menos 1,5 metros, e se non houbese unha adecuada ventilación ou asistise unha persoa con síntomas compatibles coa COVID-19, quen exerza de policía de estrados ou dirixa o acto “poderá impoñer o uso da máscara durante todo o tempo”, co obxectivo de evitar a súa suspensión do acto. 

A Sala de Goberno, ademais, indica que, nestes casos, “puntualmente e por razóns excepcionais”, se quen interveña na celebración do acto procesual non puidese “expresarse coa suficiente claridade ou facerse entender”, poderáselle permitir a retirada da máscara “parcialmente e durante o instante necesario para emitir a palabra ou frase coa que a persoa se queira expresar”, sempre que se respecte a distancia interpersoal. 

Á hora de actualizar o protocolo, o TSXG tivo en conta as situacións que no ámbito da Administración de Xustiza poidan incrementar os riscos de transmisión, tal e como establece o Real decreto 286/2022, así como as modificacións da ‘Guía de boas prácticas para a reactivación da actividade xudicial e adopción de medidas de saúde profesional para a prevención de contaxios en sedes xudiciais’, aprobadas hoxe pola Comisión Permanente do CGPX. 

No documento, advírtese que, aínda que o cambio da obrigatoriedade do uso de máscaras forma parte das modificacións nas estratexias de control da epidemia, a situación de crise sanitaria ocasionada pola COVID-19 “permanece”, e con ela “a vixencia das demais normas e medidas de carácter organizativo e tecnolóxico” que se recollen no protocolo do TSXG, “ata que o Goberno declare a finalización da situación de crise sanitaria ocasionada pola COVID-19 ou se aprobe algunha norma legal ou regulamentaria que as deixe sen efecto”.

https://www.poderjudicial.es/cgpj/gl/Poder-Xudicial/Tribunais-Superiores-de-Xustiza/TSX-Galicia/Actividade-do-TSX-Galicia/Protocolos-e-convenios/