O Tribunal Superior de Xustiza de Galicia (TSXG) confirma a sanción de 90.000 euros que a Xunta lle impuxo en 2024 a Adegas Terras Gauda por utilizar “produtos non permitidos, en contra das normas da Denominación de Orixe Rías Baixas”. A sección segunda da Sala do Contencioso-administrativo considera acreditado que a empresa usou unha substancia non autorizada na elaboración dos viños. 

A Sala salienta na sentenza que, tras analizar os resultados e o resto de informes analíticos do expediente, constata “a presenza de mosto concentrado rectificado nos depósitos de polietileno situados nas instalacións da adega”. A iso, engade que non se trata de abono orgánico rectificado, como consta na súa etiqueta. 

O TSXG asegura que a empresa non ofreceu “xustificación algunha á existencia do mosto concentrado rectificado, polo que ha de considerarse que a única finalidade é o aumento do grao de alcol dos seus viños”. 

Polo tanto, rexeita o recurso interposto por Adegas Terras Gauda contra a resolución da Xunta na que lle impuxo unha sanción total de 90.000 euros como responsable da comisión de tres infraccións administrativas de 30.000 euros cada unha delas, graves, tipificadas nos artigos 39.1.a), 39.1.k) e 39.2.b) da Lei da Viña e o Viño. 

En contra das alegacións da parte demandante, os maxistrados explican na sentenza que “nin se trata de viños novos, nin dunha adega que elabore algún tipo de bebida na que se utilice o mosto concentrado, sen que haxa constancia de que se atope autorizada para iso”. Ademais, indica que “se omite nos libros de rexistros da adega a entrada do mosto concentrado rectificado, identificado nos contedores de poliéster branco que figuran nas fotografías, coas etiquetas adhesivas parcialmente deterioradas”. 

Os xuíces tamén rexeitan a solicitude de Adegas Terras Gauda de que se lle impoña unicamente a sanción correspondente á infracción máis grave cometida. Na sentenza explican que iso non é posible, pois “non se aprecia que unhas infraccións deriven de outras”, senón que se trata de “tres infraccións independentes, que se poden sancionar por si soas”. 

O TSXG considera que a Xunta motivou a sanción de 30.000 euros imposta por cada unha das infraccións, ao ter en conta “a intencionalidade, a reiteración, o volume de vendas e a posición da empresa infractora no sector vitivinícola e o volume e valor das mercadorías ou produtos afectados pola infracción”. 

Na sentenza, a Sala fai “especial mención” ao volume do mosto concentrado rectificado adquirido pola adega, que foi de 67.000 Kg., investindo un total de 334.120 euros na súa adquisición. 

“En conclusión, trátase dunha conduta intencional de tenza nas súas instalacións, almacenado, un produto non autorizado; de realización de prácticas enolóxicas prohibidas, non rexistrando a tenza do citado produto nin as prácticas enolóxicas realizadas; e sendo coñecedora, atendida a súa pertenza a unha Denominación de Orixe, do carácter prohibido das condutas”, destaca o TSXG. A sentenza non é firme, pois cabe presentar recurso ante o Tribunal Supremo.