A sección primeira da Sala do Contencioso-administrativo do Tribunal Superior de Xustiza de Galicia (TSXG) acolleu parcialmente as pretensións do recurso interposto por unha interina contra a resolución ditada en outubro de 2022 polo secretario xeral da Subdelegación do Goberno en Ourense pola que se acordaba o cesamento da demandante, funcionaria interina da escala de Médicos Inspectores do Corpo de Inspección Sanitaria da Seguridade Social, no posto de médica avaliadora na dirección provincial do Instituto Nacional da Seguridade Social en Ourense.

En consecuencia, o TSXG anulou a resolución impugnada por ser contraria ao ordenamento xurídico e declarou que procede repoñer á recorrente no mencionado posto de traballo, con todos os dereitos profesionais e económicos inherentes ata que a Administración “provea de forma legal e regulamentaria devandito posto, con abono dos salarios deixados de percibir desde o seu cesamento ata a efectiva reincorporación, ao que deben restarse as sumas que se acrediten que puidese percibir nese tempo intermedio, máis os intereses legais que correspondan, e con todos os dereitos sociais que sexan propios daquela declaración de reposición”.

A Sala considera que o cesamento acordado é contrario ao ordenamento xurídico “porque non se adecúa ás causas recollidas no artigo 10.3 do Estatuto Básico do Empregado Público (EBEP) aplicable, polo que, ao ser contrario o cesamento ao devandito precepto, procede acoller a pretensión de repoñer á recorrente no seu posto de traballo”. A causa do cesamento foi, segundo explican os maxistrados na sentenza, a finalización da causa que deu lugar ao nomeamento. “Nese caso subsiste a necesidade de cobertura con funcionario interino da praza que continúa vacante, polo que resultaría contraditorio considerar conforme a Dereito o cesamento do interino que estaba a ocupar o correspondente posto”, indican.

Na resolución, os xuíces explican que no proceso selectivo convocado non se cubriu a praza que ocupaba a recorrente cun funcionario de carreira, porque, unha vez concluído o proceso selectivo, na resolución do 2 de setembro de 2022, da Secretaría de Estado de Función Pública, a ningún dos aspirantes que o superou foille adxudicado o posto na Dirección Provincial do Instituto Nacional da Seguridade Social en Ourense. A sentenza non é firme, pois cabe presentar recurso de casación ante o Tribunal Supremo.