A sección segunda da Sala do Contencioso-administrativo do Tribunal Superior de Xustiza de Galicia (TSXG) confirmou a sentenza do Xulgado do Contencioso-administrativo número 1 de Vigo na que acolleu o recurso contra a denegación, por parte do Concello, da licenza de obras a Cementos Tudela Veguín para a reforma dunha nave preexistente e a instalación de dous silos de cemento para 3.000 toneladas na terceira aliñación do peirao do Arenal, cuxo orzamento de execución ascende a 2,5 millóns.  

“Da pericial achegada resulta que os silos proxectados son un elemento da instalación e que, ademais das posibles razóns económicas aducidas polos técnicos do Concello de Vigo e insinuadas polo seu representante con ocasión da ratificación do perito, parece evidente que se trata de manter a capacidade de almacenamento como medio de garantir a viabilidade da concesión que, non se discute, leva aparellada a atención dun interese público”, salienta o TSXG. Ademais, na sentenza indica que “tampouco cabe descoñecer que a loxística portuaria impón que os buques permanezan nos portos o menor tempo posible, polo que non é difícil concluír que a perdida de almacenamento afectaría a viabilidade da actividade”. 

“Por outra banda, non parece razoable atender á normativa de aplicación directa de protección da paisaxe contida no artigo 91 da Lei do Solo cando resulta evidente que a instalación dos silos se vai levar a cabo nunha contorna industrial totalmente antropizado e, aínda que limiten a visión do mar, resulta que non estamos ante lugares de paisaxe aberta ou naturais, como esixe o precepto”, salientan os maxistrados. 

O TSXG indica que, contrariamente ao que mantén o Concello, a recorrente achegou xunto coa súa demanda, un informe do que entende que resulta acreditado que, dentro da instalación, actualmente, hai unha nave e dous silos, ademais doutros sete de menor tamaño. Os novos silos, segundo ese documento, “proxéctanse no interior da nave, no espazo que actualmente ocupan dous pórticos que deben ser eliminados, cunha ocupación aproximada de 300 m²”, así como que a cementeira “perderá máis do 50 % da capacidade de almacenamento, como resultará da eliminación dos sete silos de menor tamaño, cunha capacidade total de 7.300 toneladas”. Nese informe, ademais, sinálase que os silos que se proxectan “compensarían en parte esa perda e manteríase a capacidade de almacenamento”; que se proxecta colocalos “perpendicularmente para que a barreira sobre as vistas do mar sexa menor”; e que é “imposible lograr horizontalmente esa capacidade de almacenamento porque non hai espazo, para iso sería necesario ocupar 1.700 m², dos que non dispoñen”. A sentenza non é firme, pois contra ela cabe interpoñer recurso de apelación.