O catedrático de Medicina Legal do Instituto de Ciencias Forenses da Universidade de Santiago de Compostela Ángel Carracedo inaugura mañá, ás 19 horas, o segundo curso da vixésimo segunda edición da Escola de Verán do Poder Xudicial, que terá lugar no pazo de Mariñán ata o 12 de xullo. O experto, referente internacional no ámbito da xenética, abordará no relatorio a aplicación do ADN para a resolución de procesos xudiciais.

Estas segundas xornadas xirarán ao redor dos avances científicos e a súa repercusión nas resolucións xudiciais. Nelas analizaranse as últimas investigacións no campo das ciencias físicas, as innovacións tecnolóxicas con repercusión na identificación de sospeitosos e a fiabilidade das probas de ADN. Todo iso co obxectivo de que os operadores xurídicos coñezan “a significación precisa dos resultados das probas periciais científicas, evitando tanto o descoñecemento da transcendencia e importancia destes avances como a confianza absoluta e acrítica nas súas conclusións”.

A Escola de Verán desenvólvese baixo a dirección académica dos vogais do CXPX Juan Manuel Fernández e Álvaro Cuesta.