O presidente do Tribunal Supremo e do Consello Xeral do Poder Xudicial, Carlos Lesmes, inaugurou hoxe no Pazo de Mariñán a vixésimo segunda edición da Escola de Verán do Poder Xudicial, organizada baixo o título A proba criminolóxica forense. Delimitación e valoración das probas provenientes das ciencias sociais e do comportamento.

O presidente do CXPX, tras agradecerlles ao presidente da Xunta de Galicia, Alberto Núñez Feijóo, e ao vicepresidente da Deputación Provincial da Coruña, Xosé Regueira Varela, a súa colaboración para poder levar a cabo unha nova edición das xornadas, que concluirán o 12 de xullo, incidiu na obriga de promover “un Poder Xudicial que, preservando a súa independencia, actúe con transparencia e proximidade, servido por unha Carreira Xudicial exemplar, plenamente formada, que desenvolva as súas funcións con elevada profesionalidade e sentido do deber”.

Lesmes lembrou que para o CXPX a formación continua dos membros da Carreira Xudicial é “fundamental para o mantemento e mellora dos modelos de calidade da Xustiza e imprescindible para adaptarse aos cambios e ofrecerlles aos cidadáns unha Xustiza da maior calidade, na que poidan confiar e que responda ás súas necesidades”.

O presidente do Tribunal Supremo tamén fixo referencia no acto de inauguración á relación entre a ciencia e o proceso xudicial, que se tratará este ano desde distintas perspectivas na Escola de Verán. “O xuíz debe coñecer, na medida do posible, a significación precisa dos resultados das probas periciais científicas”, indicou.
Lesmes salientou que “sen Xustiza non hai convivencia” e destacou que unha sociedade só se pode “desenvolver en paz e concordia” se conta “cun mecanismo independente e neutral para a resolución de conflitos, ao que se lle recoñeza a lexitimidade necesaria para acatar e respectar as súas decisións”. O presidente do CXPX destacou que, sen el, “resulta impensable a convivencia pacífica”.

O director da Escola de Verán do Poder Xudicial e vogal do CXPX Juan Manuel Fernández adiantou que serán obxecto de debate nas xornadas “asuntos polémicos, como o son, entre outros, a relación entre a memoria e o testemuño, o proceso de funcionamento da memoria, a construción de recordos falsos, os efectos contaminadores da suxestión na declaración, o recordo suxerido e os prexuízos”. Ademais, indicou que se analizarán “resultados da investigación psicolóxica en relación a casos xudiciais concretos”.

“A apreciación e valoración da proba é a parte central da actividade xurisdicional, calquera que sexa a orde na que o xuíz desempeñe o seu labor”, lembrou Fernández, quen sinalou que “nunha época na que se empeza a falar da intelixencia artificial como alternativa ao xulgar humano, é preciso un rearmamento intelectual e ético que dote de rigor científico as decisións xudiciais”.