O Xulgado do Contencioso-administrativo número 1 de Vigo anulou o acordo da Xunta de Goberno Local do Concello de Vigo de data 3 de novembro de 2022 polo que se procedeu á aprobación definitiva do proxecto de urbanización do Barrio do Cura.

Desta forma, acolleu a demanda interposta por unha comunidade de propietarios dun edificio próximo, situado na rúa Santa Marta, e condenou ao Concello de Vigo a “corrixir as deficiencias detectadas nos planos que delimitan o ámbito do proxecto de urbanización, excluíndo a zona de chan urbano consolidado na zona libre de edificación” do inmoble da rúa Santa Marta, así como “a incorporar ao mesmo todas as determinacións esixidas pola lexislación urbanística en canto á rede de gas, o aparcamento público e a demolición da gardería”. Ademais, tamén o condenou “a deseñar a beirarrúa do Novo Viario cumprindo a normativa sobre accesibilidade”.

A sentenza non é firme, pois contra ela cabe interpoñer recurso de apelación.