A maxistrada do Xulgado do Contencioso-administrativo número 1 de Vigo anula a licenza que permitiu dividir un solar en cinco parcelas, máis a de cesión, en Cabo Estai, ao entender que non se cumpre o requisito de que os terreos obxecto de parcelación estean delimitados por viarios existentes ou de nova creación. 

Desta forma, acolle integramente o recurso interposto por un particular contra o Concello de Vigo, que o 18 de xuño de 2020 concedeu licenza de parcelación ao predio, situado na rúa Antonio Cominges de Oia, en cinco parcelas, máis a de cesión. 

Na sentenza, a xuíza conclúe que a licenza non foi outorgada de forma correcta, pois non se trazou no Instrumento de Ordenación Provisional de 2019 a aliñación dun viario público, o cal tiña que delimitar as parcelas para permitir a súa parcelación. 

Desta forma, salienta que “non existía a aliñación de viario público no Instrumento de Ordenación Municipal”, pois o que existía era un "carreiro a pé", tal e como afirmou no seu informe o secretario municipal naquel momento. Polo tanto, destaca que non se debeu conceder o permiso de parcelación.   

No fallo, a maxistrada considera que non se infrinxiron as disposicións do Plan de Ordenación do Litoral en canto ao outorgamento da licenza, tal e como defendeu a parte recorrente. A sentenza non é firme, pois cabe presentar recurso de apelación ante o TSXG.