O Tribunal Superior de Xustiza de Galicia (TSXG) denega a suspensión cautelar da orde na que a Consellería de Sanidade determinou os servizos mínimos durante a folga convocada pola Organización Sindical Facultativos de Galicia Independentes (O´Mega), que afecta ao colectivo de facultativos de atención primaria desde o pasado 2 de marzo.

A sección terceira da Sala do Contencioso-Administrativo explica no auto que rexeita a petición do colectivo debido “ao carácter esencial das funcións e atribucións que os facultativos de atención primaria cumpren nos diversos centros sanitarios existentes na nosa comunidade autónoma”.

A iso engade que a resolución da Xunta impugnada expresa que, segundo os informes do Sistema Nacional de Saúde, “os tempos de espera para obter cita en atención primaria experimentaron un incremento nos últimos anos, situándose en medias superiores ás rexistradas en exercicios anteriores”. Dita resolución, segundo recolle o auto, advirte de que “o carácter indefinido da folga impide a reprogramación ordinaria da actividade e podería provocar un incremento adicional dos tempos de espera, co consecuente risco de agravamento de procesos clínicos que precisan atención oportuna”.

Os maxistrados, ademais, indican que se interesa que se suspenda a executividade da totalidade dos servizos esenciais establecidos na orde, sen que por parte de O´Mega “se formulen pretensións subsidiarias, tendentes a moderar ou reducir eses servizos mínimos”.

Por todo iso, o TSXG, aínda que aprecia a existencia de circunstancias de especial urxencia, dado que a folga xa comezou e os servizos mínimos están en vigor, rexeita a súa solicitude, sen prexuízo do que decida en canto ao fondo do asunto. Contra o auto non cabe a interposición de recurso.