“A discriminación contra calquera persoa por razón da súa discapacidade constitúe unha vulneración da dignidade e o valor inherentes do ser humano”, Convención sobre os dereitos das persoas con discapacidade, Nova York 13 de decembro de 2006.

O acceso á xustiza é un principio básico do Estado de Dereito, proclamando o artigo 24 da nosa Constitución que “todas as persoas teñen dereito a obter a tutela efectiva dos xuíces e tribunais no exercicio dos seus dereitos e intereses lexítimos, sen que, en ningún caso, poida producirse indefensión”. Tal dereito non pode verse impedido, limitado ou constrinxido por ningunha circunstancia, e polo tanto tampouco por razón da discapacidade. Polo contrario, é un deber ético pero tamén xurídico outorgar unha protección reforzada ás persoas que poden ter un grao maior de dificultade para facer efectiva a realización plena dos seus dereitos.

Non son poucas as barreiras coas que nos atopamos as persoas con discapacidade nas diversas facetas da vida, pero neste punto convén non esquecer que a discapacidade, como reza o preámbulo da Convención da ONU, “é un concepto que evoluciona e que resulta da interacción entre as persoas con deficiencias e as barreiras debidas á actitude e ao ambiente que evitan a súa participación plena e efectiva na sociedade, en igualdade de condicións coas demais”.

Co desexo de evitar os obstáculos que condicionan o acceso aos Tribunais de Xustiza, o Consello Xeral do Poder Xudicial, como máximo órgano de goberno do Poder Xudicial, acordou a creación do Foro Xustiza e Discapacidade. A súa posta en marcha produciuse en virtude dun Convenio interinstitucional subscrito o 1 de decembro de 2003, coa finalidade básica de coordinar as Institucións Xurídicas do Estado, para conseguir unha maior efectividade na tutela xudicial dos dereitos das persoas con diversidade funcional, máis de catro millóns no noso país.

O Foro Xustiza e Discapacidade está conformado, ademais de polo propio Consello, polo Ministerio de Xustiza; o Ministerio de Sanidade, Servizos Sociais e Igualdade; a Fiscalía Xeral do Estado; o Consello Xeral da Avogacía Española; o Consello Xeral de Procuradores de España; o Consello Xeral do Notariado (Fundación Aequitas); o Colexio de Rexistradores da Propiedade Mercantil e de Bens Mobles de España; o Consello Xeral de Colexios Oficiais de Graduados Sociais; Comité Español de Representantes de Persoas con Discapacidade -CERMI-; e pola Fundación ONCE. Tamén se incorporaron ao longo destes anos expertos de diferentes actividades, o que conforma un órgano que, sendo de carácter esencialmente xurídico, non prescinde doutros coñecementos do saber humano.

Nesta páxina poderá atopar información sobre as nosas actividades, así como diversas ligazóns de interese.

Ademais, en cada Tribunal Superior de Xustiza, hai un delegado ou delegada de discapacidade a quen poderá dirixirse para resolver calquera dúbida que se lle poida presentar na súa relación cos Tribunais de Xustiza; sen prexuízo, desde logo, da posibilidade de dirixirse ao Consello Xeral do Poder Xudicial a través das canles establecidas para tal efecto para formular queixas ou suxestións. Ademais, as diversas institucións que conforman o Foro, teñen establecidas canles propias para atender esas solicitudes.

As persoas con discapacidade poden facer achegas á sociedade en igual medida que as persoas sen discapacidade sempre que esa sociedade estea construída sobre os valores do respecto e da inclusión de todas as persoas. Salientando a Convención “o valor das contribucións que realizan e poden realizar as persoas con discapacidade ao benestar xeral e á diversidade das súas comunidades, e que a promoción do pleno goce dos dereitos humanos e as liberdades fundamentais polas persoas con discapacidade e da súa plena participación terán como resultado un maior sentido de pertenza destas persoas e avances significativos no desenvolvemento económico, social e humano da sociedade e na erradicación da pobreza”.