Descenden en Galicia no terceiro trimestre os lanzamentos consecuencia de execucións hipotecarias e falta de pagamentos de aluguer

Aumentan un 28 % as demandas por despedimento presentadas de xullo a setembro nos xulgados do Social da comunidade

Autor
Comunicación Poder Judicial

O número de lanzamentos practicados en Galicia no terceiro trimestre do ano experimentou un lixeiro descenso do 1,7 por cento respecto ao mesmo período de 2016, ao pasar de 461 a 453. No conxunto do Estado rexistrouse unha diminución interanual do 4,7 %. Dos lanzamentos practicados en Galicia, como consecuencia de procedementos de execución hipotecaria producíronse 147, fronte aos 153 de 2016, o que reflicte un descenso do 3,9 por cento. Como consecuencia de procedementos derivados da Lei de Arrendamentos Urbanos (principalmente falta de pagamentos de aluguer) rexistráronse 286, fronte aos 298 do ano pasado no mesmo período, o que supón unha baixada do 4 %.

No apartado doutras causas rexistráronse no terceiro trimestre deste ano 20 casos, fronte aos 10 de 2016.
O número de execucións hipotecarias iniciadas entre o 1 de xullo e o 30 de setembro descendeu con respecto ao ano pasado, continuando a tendencia á baixa dos últimos períodos, que só se viu interrompida polo incremento rexistrado no primeiro trimestre deste ano. No terceiro trimestre presentáronse 203, fronte ás 207 de 2016, o que supón un descenso interanual do 1,9 %, segundo se desprende do informe ‘Efectos da crise económica nos órganos xudiciais’ que hoxe fixo público a Sección de Estatística do Consello Xeral do Poder Xudicial.

Baixa tamén o número de concursos presentados nos xulgados do mercantil galegos. Fronte aos 69 que se rexistraron no terceiro trimestre de 2016, pasouse a 63, o que representa unha baixada do 8,7 por cento. Con respecto aos concursos de persoas naturais non empresarias, que se tramitan nos xulgados de Primeira Instancia, en Galicia rexistráronse de xullo a setembro 10, fronte aos 13 do ano pasado no mesmo período.

En Galicia rexistráronse no terceiro trimestre do ano 9 expedientes do artigo 64 da Lei Concursal, relativo á modificación substancial das condicións de traballo de carácter colectivo ( ERE’ s), fronte aos 4 do mesmo trimestre de 2016.

As 1437 demandas por despedimento presentadas nos Xulgados do Social entre o 1 de xullo e o 30 de setembro pasados supoñen un incremento interanual do 27,7 por cento (o ano pasado rexistráronse 1125).

O informe sinala así mesmo que continúa o descenso dos procedementos monitorios presentados no terceiro trimestre do ano nos xulgados de Primeira Instancia e de Primeira Instancia e Instrución. En Galicia presentáronse 5742 neste período, fronte aos 6450 do ano pasado, o que supón un descenso interanual de 11%.

Consulte os datos estatísticos correspondentes ao terceiro trimestre de 2017 e as series completas desde 2007 na seguinte dirección:

http://www.poderjudicial.es/cgpj/es/Temas/Estadistica-Judicial/Estudios-e-Informes/