O Tribunal Superior de Xustiza de Galicia (TSXG) acolleu hoxe o acto de xura ou promesa dunha xuíza do Tribunal de Instancia do Carballiño e dun xuíz do Tribunal de Instancia de Marín, os cales ascenderon pola quenda de antigüidade a maxistrado/a. Ambos continuarán desempeñando as súas funcións nos mesmos destinos.

Ao acto, presidido por Ignacio Picatoste Sueiras, presidente do TSXG, asistiron o presidente da Sala do Social, Luis Fernando de Castro Mejuto; a presidenta da Sala do Contencioso-Administrativo, María Azucena Recio González; e o secretario de Goberno do TSXG, Juan José Martín Álvarez, así como membros da Sala de Goberno e familiares da titular da praza 2 da Sección Civil e de Instrución do Tribunal de Instancia do Carballiño, Mónica Sotelo Cao, e do titular da praza 2 da Sección Civil e de Instrución do Tribunal de Instancia de Marín, Fernando Rodríguez Rivas.

Durante a súa intervención, o presidente do TSXG sinalou que os dous membros da carreira xudicial consolidan “o seu compromiso coa Administración de Xustiza”, pois manifestou que xa coñecen “a realidade do que é” o traballo dos xuíces/zas. Así, destacou que, tras os anos de xuíz/a, aprenderon “o desempeño da función xurisdiccional” e decatáronse de que “non só é saber dereito, de leis, senón que se trata de dar unha resposta fiable e comprensible”.