Bizkaiko Probintzia Auzitegiko Seigarren Atalak Bizkaiko Foru Ogasuneko funtzionario bat 10 urte eta lau eguneko espetxealdira kondenatu du, erabiltzeko baimenik ez zuen izaera erreserbatuko zerga-datuetara sartzeagatik jabekide zen aholkularitza-enpresaren mesedetan erabiltzeko, non berak ere zerga-aholkularitza zerbitzuak ematen baitzituen.

Auzitegiak, gizon hori funtzionario publikoak sekretuak ezagutarazteko eta agerrarazteko egindako lau delituren egiletzat jotzen du, eta delitu bakoitzeko, bi urte, sei hilabete eta egun bateko espetxealdia ezartzen dio, bai eta 18 hilabete eta egun bateko isuna ere, eguneko 10 euroko kuotarekin, eta 9 urteko desgaikuntza absolutua ere.

Halaber, funtzionario publikoari debekatutako jardueren delitu baten egile gisa, sei hilabeteko isuna ezartzen zaio, eguneko 10 euroko kuotarekin, eta enplegu edo kargualdi publikoa bi urtez etetea.

Bizkaiko Auzitegiak frogatutzat jo du Bizkaiko Foru Aldundiko funtzionario auzipetuak, 1986tik Ogasun eta Finantza Sailean lan egiten zuela zerga-informazioaren atalean eta, aldi berean, aholkularitza fiskaleko jarduerak egiten zituela "jabekidea" zen aholkularitza-enpresa batean, eta hori "bateraezina" zen aldundian betetzen zuen funtzio publikoarekin.

Gainera, foru-ogasuneko funtzionario zela aprobetxatuz, "bere lanpostua kontuan hartuta baimenik ez zuelako" debekaturik zituen zerga-datuak eskuratu zituen, gutxienez 2017tik 2019ra bitartean. Zerga-datu horiek bere aholkularitza-enpresako bezeroenak ziren, bai eta bezero horiekin zerikusia zuten beste pertsona eta enpresa batzuenak ere.

"Horri esker, beste pertsona eta erakunde batzuen zerga-datu erreserbatuen berri izan ahal izan zuen", eta "bere aholkularitza-enpresaren eta bezeroen mesedetan erabili ahal izan zituen, eta kalte egin zion Bizkaiko Foru Aldundiari, fitxategien titular eta edukien zaintzaile baitzen; izan ere, aldundiak zergen kudeaketan irregulartasunak detektatzeko tresna nagusietako bat urratu zuen".

Bizkaiko Auzitegiak auzipetua kondenatzeko orduan, zeinak ahozko judizioan egotzitako egitateak ukatu baitzituen, honako hau hartu du kontuan: aholkularitza-enpresako zenbait bezerok ikustaldian egindako deklarazioa, akusatua bere aholkulari fiskala zela onartu baitzuten, bai eta irregulartasunak berretsi zituzten foru-erakundeko zerbitzu-arduradunen eta laguntza teknikoko arduradunen txostenak eta lekukotzak ere, besteak beste.

Zigorrei dagokienez, auzitegiak erabaki du bi delituetan gutxieneko hedadura ezartzea, "egindako egitateekiko proportzionala" baita, eta gaineratu duenez, "puntualak dira, ez baita egiaztatu aurrez pentsatutako plan bati zor zaizkionik, eta ez dago jasota ekonomikoki ebaluatzeko moduko kalterik dagoenik, ez Bizkaiko Foru Ogasunari dagokionez, ez Ogasunaren fitxategietan jasotako datuak erabiltzeak eraginda suerta daitezkeen pertsona fisiko edo juridikoei dagokienez".

Apirilaren 16ko epai hau ez da irmoa eta bere aurka errekurtsoa aurkez daiteke Euskal Autonomia Erkidegoko Auzitegi Nagusian.