A quinta edición do curso A protección do patrimonio histórico e a súa conexión co urbanismo, organizado polo Servizo de Formación Continua do Consello Xeral do Poder Xudicial (CXPX) e ao que asisten xuíces e xuízas de diferentes comunidades autónomas, comezou hoxe no auditorio do Museo das Peregrinacións de Santiago de Compostela. As xornadas formativas, que finalizarán o 12 de abril, inauguráronas o presidente do Tribunal Superior de Xustiza de Galicia (TSXG), José María Gómez y Díaz-Castroverde, e o conselleiro de Cultura, Educación, Formación profesional e Universidades, Román Rodríguez González.

Durante a súa intervención, Díaz-Castroverde destacou que Galicia consolidouse entre os membros da carreira xudicial como referente estatal en formación sobre patrimonio e urbanismo. Ademais, resaltou a calidade dos relatores de todas as edicións do curso, dirixido pola presidenta da Sala do Contencioso-administrativo do TSXG, Dolores Rivera Frade. Este ano, as xornadas contarán coa participación de David Chipperfield, premio Pritzker de Arquitectura 2023, quen na sesión de mañá analizará o equilibrio entre a arquitectura moderna e a protección do patrimonio histórico.

Carlos Lesmes, maxistrado da Sala Terceira do Contencioso-administrativo do Tribunal Supremo, presidente da sección quinta da devandita Sala e expresidente do Tribunal Supremo e do CXPX, ofreceu hoxe a conferencia inaugural, titulada O urbanismo na cidade histórica. O exemplo de Santiago de Compostela.

Ao longo das tres sesións, os/as relatores profundarán nas medidas dirixidas a fomentar a protección do patrimonio. En concreto, tratarán os plans urbanísticos ou a aplicación de modelos matemáticos na protección preventiva do patrimonio cultural, con referencia ao modelo computacional da Catedral de Santiago de Compostela. O director da Fundación Catedral de Santiago de Compostela, Daniel Lorenzo, transmitirá a importancia da conservación e restauración dos bens protexidos durante a visita que os/as asistentes ao curso realizarán ás cubertas da Catedral. Na última xornada abordaranse, en dúas mesas redondas, a necesidade dun urbanismo accesible e a protección do patrimonio cultural a través da figura do Ombudsperson. O vogal do CXPX José Antonio Ballestero Pascual será o encargado de clausurar a quinta edición do curso.